Muqdisho:- War naga soo gaarey Xarunta Gobolka Baay ee Magaalada Baydhabo ayaa waxay sheegayaan in Madaxweynaha DFKM Mudane Cabdulahi Yusuf, Raysul wasaaraha Dowlada ku meel gaarka ah Mudane Cali Maxamed Geedi iyo Raysul Baarlamaanka Federaalka Mudane Aadan Madoobe ay u dhoofeeyn magaalada Addis Ababa ee xarunta wadanka Ethiopia.

Dhoofkan ayaa yimi iyadoo ay dood aad u kulul ay ka dhex socoto Xubnaha Baarlamaanka iyadoo mustaqbalka Xukuumada Geedi ay baalaha saaran tahay oo laga yaabo iney dhacdo.

Tegitaanka 3da masuul ee ugu sareeya Dowlada ku meel gaarka ayaa lagu micneenayaa in Dowlada Ethiopia ay isku taxaluujineyso sidii ay u xalin lahayd khilaafka ba'an ee dhax yaala masuuliyiinta Sar sare ee Dowlada.

Sidoo kale wararku waxay intaa ku darayaan in Geedi, Yusuf iyo Madoobe-ba ay diyaarad wada qaateen oo isla markaana si deg deg ah ku dhoofey.

Amniga garoonka diyaaradaha ee magaalada Baydhabo ayaa waxaa gaaf wareegayey ciidamo isku dhaf iyadoo amniga loo adkeeyey, lagana baqayey qaraxyo lala beegsado masuuliyiinta Dowlada.

Baarlamaanka ayaa weli doodi u socotaa iyadoo ay hareen xubno tiro yar iney hadalkoodii dhiibtaan, qodobada ugu kul kululna waxaa ugu weyn la xisaabtanka Xukuumada iyo in kalsoonida laga qaado iyo inkale.

LaasqorayNET/ Nuur Cismaan.

Muqdisho