Waxa aan tixdan yar ee gaaban u tiriyay Janaraal Cabdillaahi Axmed Jaamac (Ilka Jiir). Runtii waxaan jeclaan lahaa in aan inta aan ka aqaan jenanka in ka badan  ka aqaanno. Taas oo ii sahli lahayd in aan wax intaa ka badan ka sheegi karo.  Laakiin intan waxaan ugu abaal gudayaa sidii sharafta iyo quruxda lahayd ee uu jenaraal Cabdillaahi uga qayb qaatay doorashadii madaxtinimada Puntland ee dhawaan la soo gabagabeeyay.
 
Aniga oo ka mid ahaa dadkii taageerada u hayay Jeneraal Ilka jiir, waxa aan aad uga mabsuuday hadaladii qiimaha lahaa ee uu ka jeediyay madasha markii lagaga guulaystay tartankii doorashada. Waxa sidoo kale I farax geliyay markii uu ogolaaday in uu maamulka cusub ka qayb galo, ka dib markii u dhageystay talooyinkii taageerayaashiisa iyo guurtidaba.  Kuwaas oo qabay sidayda oo kale in ay qabashada xilkaas ay dani ugu jirto shacabka reer Puntland oo dhan. Tixdii yaraydna waa tan:

Inkastaan jeclayn jiirta sare, inuu ka soo jeesto
Ilka jiir jagada uu aqbalay, talada loo jeedshey
Dadka debedda joogiyo kuwaa, jira dalkii hooyo
Jiilaal abaar kulul nafluhu.jilicsanyoo liito
Jirka guga sidii roob curtaa, loogu jeel qabaye
 
Waa janan jiriida ah colkana, jabiya goobtiiye
Waa caalim jeer hore ka baxay, jaamacaad sare e
Mar waa oday jaxaafa ah gartiyo, geedka joogsada e
Marna waa hoggaanshaha jundiga jiidha nacabkiiye
Jirri iyo midkii xeer jabshana, jiidh u naxahayne
Jifidiisa hoosiyo qabiil jiidan ma hayaane
Ma jujuubo shacabkiisa iyo qaar la jaalla ahe
Ma jidhjidho dhaqaalaha dadkoo, jeeb ma buuxsado e
Uma joojo jaar baan nihiyo,  jabaqda Iidoore
 
Jaahiisa nuur iyo buruud, johorad moodayso
Fulihii jalleecaaba waa, jeedlanahayaaye
Isagaan jawaab adagba bixin jaahilkii cararye
Jidhaamaha sanaaggba ka baxe, jaad cunkii yimide
Jilba joog rag baa ugu ridoo, boholo jeexeene
 
U jarmaad Cagaariyo Cadaad, jeexdimaha Hawde
Allow jananku joogoo cimrigii, laba jibaar gaadho
Allahayow firdowsada jannada jaasadii noqoto
 
Kelmed shacabku jeedshana, bal aan jiinka ka higaadsho
Xukun jilicsan baa nooga daran, jaa’ir geesiyahe
mid carruurta jaliyaana waa, garawrac lagu jiidye
 
Raggii joogay Goobtanee in badan, jala butaynaayey
Jirjiroolayaashii bahdood jare ku naafeeyey
Kuwii gobol ay joogeen dadkiis, la dul jibaaxaayeey
 
Oo qaxoonti soo jabay is tubay, jabad agtoodiiya
Oo cadaw arlada soo juq yidhi, jilif ku tuuraynin
Oo aan jiscimahayn kuwii jiidda hore joogay
Oo qaar la jiifaa xanuun, daawo jirinaynin
Hadday naga jiciirteen maruun waw jac iyo hooge
Abaalkoodu waa jahanamoo, lagu jaseeyaaye
Jamaacada haddeertana bal suga, halkay u jaan qaado

Maxamed Hirad
 xagar2000@sbcglobal.net